Aðgengi að upplýsingum hefur aldrei verið eins gott og það er í dag. Það hefur heldur aldrei verið eins auðvelt að tjá sig á opinberum vettvangi. Tilkoma internetisins hefur gjörbreytt því hvernig fólk aflar sér upplýsinga og bloggið hefur haft sömu áhrif á hvernig fólk tjáir sig. En er allt þetta magn af upplýsingum og persónulegum upplýsingasíðum af hinu góða? Þeirri spurningu svarar Lára Jónasdóttir í þessum miðvikudagspistli. „Því ef þú vilt segja eitthvað, þá skaltu átta þig á því að vefurinn þrífst á sérhæfðu efni. Þar er betra að takmarka sjálfan sig við ákveðið efni og höfða til þrengri hóps, vita mikið um lítið, og keppa við 1.000 aðra bloggara frekar en að afmarka sig ekki og vita lítið um mikið, en um leið að keppa við 5.000 aðra bloggara um athygli.”
Hafir þú eitthvað að segja skaltu forðast að skrifa greinar eða blogg með hraði, eða skrifa eitthvað sem er grunnhyggið og tilgangslaust. Í stað þess að eyða tíma þínum í að semja mörg stutt og tilgangslaus blogg áttu að spara tímann og semja eina góða innihaldsríka grein.
Jakob Nielsen sem er einn þekktasti vefgúrúinn segir að fólk sem hefur eitthvað að segja og vill láta taka mark á sér eigi ekki að eyða tímanum í ómerkileg blogg og endalausar umræður á bloggum. Vissulega hafa blogg sinn tilgang á mörgum stöðum en athuga verður vandlega hvar þau eiga við, viljir þú láta taka mark á þér á annað borð.
Láttu taka mark á þér
Það er eins og allir hafi eitthvað að segja, sem er gott en hversu mikið vilt þú að það sé tekið mark á því sem þú leggur til í bloggpottinn? Það eru ákveðin takmörk fyrir því hversu innihaldríkt og marktækt blogg getur verið, það eru takmörk fyrir því hversu mikið þú getur bætt við með kommentum á annarra manna skoðanir. Því ef þú vilt segja eitthvað, þá skaltu átta þig á því að vefurinn þrífst á sérhæfðu efni. Þar er betra að takmarka sjálfan sig við ákveðið efni og höfða til þrengri hóps, vita mikið um lítið, og keppa við 1.000 aðra bloggara frekar en að afmarka sig ekki og vita lítið um mikið, en um leið að keppa við 5.000 aðra bloggara um athygli.
Af þessu mætti halda að allir bloggarar keppi um athygli, veit ég að það er ekki satt og margir blogga beinlínis til að koma hugsunum sínum á blað, athugasemdir eru bara auka bónus. En það finnst samt flestum leiðinlegt þegar engin heimsækir bloggin þeirra, það er einhver keppnistilfinning sem leynist í öllum bloggurum.
En ástæða þess að það er hægt að gefa sér að blogg sé verra en vel ritaðar greinar eru meðal annars að ekki er hægt að treysta á að bloggarinn hafi gefið sér tíma til að úthugsa skrif sín, stundum eru fleiri klukkustundum eytt í eitt blogg en stundum nokkrum mínútum. Stundum hafa bloggarar eytt mörgum mánuðum í að spá í efnivið bloggsins og vita fullkomlega hvað þeir eru að tala um. Stundum vita bloggarar ekkert hvað þeir eru að tala um en rödd þeirra heyrist jafn hátt og þeirra sem vita hvað þeir eru að tala um. Sumir blogga því þeir hafa fengið skemmtilega hugmynd og hafa virkilega eitthvað að segja, aðrir blogga af skyldu við bloggið sitt.
Upplýsingamengun
Upplýsingamengun á Netinu er orðin gríðarleg og það er nokkuð víst að það er ekki hægt að taka mark á 90% af þeim upplýsingum sem eru á Alheimsvefnum. Því skalt þú ekki taka þátt í því að menga með því að setja á Netið pósta sem eru undir meðallagi. En sem betur fer býr bloggheimurinn yfir einskonar sjálfskipulagi þar sem góðir póstar fá mikla athygli og tengla svo þeir fá meiri sýnileika.
Nú skulum við snúa okkur aftur að því af hverju fólk ætti frekar að skrifa innihaldsríkar greinar en blogg, vilji það koma skoðunum sinum á framfæri og jafnframt að það sé tekið mark á þeim. Það tekur lengri tíma að skrifa góða grein með innihaldi en innantóm lélegt blogg. Þúsund apar sem skrifa í 1000 klukkustundir gera ekki ritverk á við Shakespeare. Þrátt fyrir allar 1000 greinar apanna fá lesendur ekki að sjá heildarmynd og skilning á því sem fjallað er um.
Fyrir þá sem vilja skrifa greinar rétt, er bent á að lesa þær viðmiðunarreglur sem Jakob Nielsen hefur sett upp fyrir ritun greina á vefnum. Mundu að vera stuttorður, nota punkta og áherslur á lykilorð og nota lýsandi fyrirsagnir. Þeir lesendur sem leita að innihaldi lesa í F-mynstri, svo orðin fyrst í fyrirsögnum eru miklvægari en þau síðustu.
Sjálf hef ég reynt að fara eftir þessum viðmiðunarreglum við ritun þessarar greinar, þeim er ekki fylgt til fullnustu en ég reyndi, það er alltaf mikilvægt að reyna gera greinar sínar góðar. Jafnframt er mikilvægt að gera bloggin sín góð, ekki setja hvaða bull sem manni dettur í hug á vefinn, það er fólk sem les bloggið þitt eða það efni sem þú setur á Netið. Það er alls ekki óþekkt að fólk sé googlað þegar það sækir um vinnu, því skaltu ávallt vera meðvitaður um að allir geta lesið það sem þú setur á vefinn. Vandaðu það sem þú skrifar.
Heimildir:
Greinin eru að mestu leyti byggð á þessari grein Jakobs Nielsen, en staðfærð á einstaka bloggara
http://www.useit.com/alertbox/articles-not-blogs.html